Pingaarnerutitaq Torben Reimer, aaqqissuussaanermut pisortanillu ineriartortitsinermut pisortaq Ass.: Royal Greenland Asasara suleqat, Royal Greenlandimi sulinerup suna nuannequtigineraa pillugu qanittukkut aperineqarpunga. Sulisunillu nutaanik atorfinitsisisoqassatillugu apeqqut taanna apeqqutigineqarajuppoq, qujanartumillumi akiuminarpoq. Amerlasuunik annertuunillu unammilligassaqaraluarluta Royal Greenlandimi pisut nuannersut aamma amerlapput. Pisariaqartarporli tamakkuninnga immitsinnut eqqaasittarnissarput, tamannalu pikkoriffiginngilarput. Royal Greenlandip pitsaasortaanik immitsinnut eqqaasittarnitsigut unammilligassatta naammassinissaannut aallaavissaqarnerulissaagut. Ajoraluartumilli takusarparput ajornartorsiutinik annerusumik isiginninneq allanillu uparuartueqqajaaneq. Aamma takusarparput suleqatigiinnikkut suliassanik naammassinnittannginneq kiisalu suleqatinut imminermut suliassanullu paasinninneq annerusinnaasaraluarluni. Aamma takusarparput suliffeqarfissuup anguniagaasa naammassiniarnerannut suleqatigiinneq annerusinnaagaluartoq. Tamatta akisussaaffeqarpugut suliassat qanoq iliuuseqarfiginissaannut, akisussaaffeqartariaqarpugullu pisut pitsaanerulersissagutsigit. Tamatumunnga atortigit pingaartitatut maleruagassat!! Sulisutsialaat Royal Greenland pillugu pitsaasutut suunuku taaneqarsinnaasut? HR-imi (inuttut isumalluutit) akisussaasutut sulisutsialaat siullertut taassagukkit pissusissamisuussaaq. Pikkorilluinnartunik piumassuseqarluartunillu sulisoqarpugut, allaat aalisakkerinermi allatigullu ingerlatani sulisut pikkorinnerpaat sulisoralutigit. Tamanna tulluussimaarutissaraarput, taamalu inissisimanerput anguniagaajuaannassaaq taamaanngippat unammillertitsinnut angummassinnaassannginnatta. Anguniartuaannassavarput unammillertitsinnit pikkorinnerujuaannarnissarput. Tamanna illit pisortavillu akisussaaffigaarsi. Akisussaaffik, Royal Greenlandimi sumiikkaluaruttaluunniit sulisut ineriartortittuaannarnissaannik pisussaaffiliisoq, allanut tunniunneqarsinnaanngilaq. Royal Greenland pitsaaneruleriartortillugu sulisut pikkorissut atorfissaqartitagut tigummiinnassallugit nutaallu sulerusulersissallugit nukissaqarnerulissaagut. Siunissaq maanna aallartippoq Suliffeqarferujussuartut inuiqatigiinni akuuffigisatsinni akisussaaffeqarpugut inuusuttut atuarfimmik naammassinneqammersut pitsaasumik ilinniagaqarnissaannut kivitseqataanissamut. Taamaasiornitsigut siunissami atorfissaqartitagut sulisut pikkorissut ineriartortinnissaannut periarfissinneqassaagut. Inuusuttut taakku pilerngunneqarput, sulisussaqarnermullu taakku pingaaruteqarmata ilinniartaanerat pingaartillugu pimoorunnerulerparput. Ilinniartuuteqarnermi suliffik allanngorartunik unamminartunillu suliassalik aqqusaarneqassaaq, ilinniartuunerullu inuusuttut suliatigut inuttullu ineriartortissavai nunani allani pisunik ilisimasaqarnerulersissallugit. Kalaallit Nunaanni ilinniartuuteqarneq Nutaatut aallartitanut ilaavoq Kalaallit Nunaanni ilinniartuuteqarneq nunani allani ingerlatanik malinnaanissamut aamma ilalik. Suliffeqarfimmi nunani tamalaani ingerlatsisumi ukiut marluk atorneqassapput tamatigoortumik itisiliinermillu ilisimasaqalernissamut aqqutissiuisoqassalluni. Ilinniartuuteqarnikkut siunertaavoq ungasinnerusoq isigalugu Kalaallit Nunaanni avataanilu suliffinnik kalaallit inuusuttut sulisorisalernissaat. Immikkoortortat amerlasuut akuutinneqarput tamannalu akisussaaffeqaqataanermik ilaqarpoq. Taamaattumik ilinniartut taakku ornitaanni tikilluaqqulluarisigit. Naqitaq ”Navigatio” Royal Greenland A/S-imit saqqummersinneqartarpoq • Pisartagarerusukkukku allassaatit uunga royalgreenland@royalgreenland.com Akisussaalluni aaqqissuisoq: Sofia Geisler • Aaqqissuisut: Sofia Geisler, Louise Lee Leth • Ilusilersuisoq: Naqitat A/S, Dorte Olsen • Naqinnera: Naqitat A/S Royal Greenland A/S • Postboks 1073 • 3900 Nuuk • Tel. (+299) 36 13 00 • Fax (+299) 32 33 49 • royalgreenland@royalgreenland.com •www.royalgreenland.com Saqqaa: Ukiormanna majip naajartornerani Nunap Isuata kujataani kilisaat `Sisimiut` saarullinniarluni kaleqqammersoq, takuneqarsinnaalluni pisaqarluarsimasut.
Download PDF file
Build your own flipbook