Asasakka suleqatit Pâviâraq Heilmann, COO Ass.: Royal Greenland 2009 atulerparput qularnanngitsumik nunarsuarmioqatigiit tamat aningaasaqarnikkut ajornartorsiorfissaat. Royal Greenlandiinnaanngitsoq ajornartorsiornermit eqqugaasimassaaq, nunanili tamani suleqativut Royal Greenlandip peqataatitaqarfiiniittut tatiginarlutillu ilumoortut eqqugaapputtaaq. Taamaattumik pingaaruteqarpoq suliffipput suleqativullu killup tungaanut aallarnitsinnut sillimmartaassasut, taamaakkallarnerinnaavormi. Aningaasaqarnikkut killup tungaanut aallarnerit tamarmik killeqartarput, iluarsiffissaqartarput: atugarissaarnerusoqartarpoq. Royal Greenlandip atugarliornini assortorniarpaa ilaatigut nutarterluni, niuerfiit pingaarutillit aalajangiusimallugit niuerfissallu nutaat iliuuseqarsinnaassutsimik takutitsinikkut pissarsiaralugit. Ilisarnaaterput nutarterparput takutillugulu Royal Greenland suliffeqarfiusoq ukiunut atukkanut malinnaasoq. Aalajaatsunik nioqqutissiortoqarfeqarpugut ukiorpassuarni atitsinnik takutitsillutik pitsaassusermik pitsaasumik tunniussisartunik. Nioqqutissiorfeqarfimmik allissummik Koszalinimi aamma pilersitsivugut, Royal Greenlandip niuerfissaanik nutaanik ammaasussamik. Tuniniaasoqarfeqarpugut eqqummaariffiulluni nioqqutissiatsinnik aqqutissiuussisussamik sullitatsinnut aalajaatsunuinnaanngitsoq, aammali sullitassanut nutaanut nioqqutissianik assigiinngiiaarnerullutillu amerlanerulersunik nittarsaaffiginnittartumik. Kalaallit Nunaanni maani piumassuseqarluartumik nioqqusiatsinnik pisinnaasaqarnermut naleqqussaraluarluta aalisarnermut ataatsimiititaliarsuarmi nalunaarusiornermik suliaqarnermik siunertaqartumik sulinerani peqataavugut aalisarnermi inatsimmik nutaamik pilersitsinermik tunngaviliisussamik. Aalisarnermik inatsit politikkikkut akuersissutigineqassappat tamanna ilusilersorluagaanerusumik inatsiseqalernermik kinguneqassaaq, Kalaallit Nunaatattaaq pinngortitaassutsimigut pisuussutaanik pisariaqartumik nakkutiginninnerussalluni kiisalu nukittorsaassalluni taakku atasinnaasumik ingerlalereersut atorneqarneranni. Tamatumattaaq Royal Greenlandip immap pisussutaanik nerisassiorluni nioqqutissiminik Mari- ne Stewardship Councilimut (MSC) ileqqorissaaarnissamik atajuaannartitsinissamillu periutsit aallaavigalugit akuerseqqusilluni qinnuteqaataa nukittorsassavaa. MSC-p ukiuni kingullerpaani ileqqorissaaarnissamik atajuaannartitsinissamillu periutsit aallaavigalugit immap pisuussutaanik atugassianik nioqqutissianik nalunaarsuisarnermigut nunarsuarmi nunani tamani atuisartunut sunniuteqarnerpaajusimavoq. Pinngortitarsuup pisuussutaanik ataavartitsinermik tunngaveqarpiarluni atuineq Kalaallit Nunaata imartaata tunniussaa piumasaqarpoq pisuussutit atorneqassasut sapinngisamik pitsaanerpaamik nioqqutissiornikkut. Ullumikkut Kalaallit Nunaanni raajanik nioqqutissiaqarpugut nunarsuaq tamaat isigalugu pitsaanerpaanik, aamma tamanna atuuppoq qaleraliutitsinnut saattuaatitsinnullu. Silatusaartumittaaq nioqqutissiarisariaqarparput saarullik Kalaallit Nunaata imartaanut takkukkiartuaartoq. Imaaratarsinnaavoq nutaamik eqqarsartaaseqartoqartariaqartoq, aammali imartatta saarullippassuaqarallarnera kingumut takorloorsinnavarput: saarullipassuarnik tarajortikkanik nioqqutissiortoqarnera. Nutaaliornermi puugutaq itisooq nassaareqqitariaqanngilaq; nioqqutissioriaatsit nutaat misilittakkallu ataqatigiissinneqarsinnaapput taamaalillunilu nioqqutissiat pitsaanerulersillugit imminut akilersinnaanerusumik ingerlataqarnikkut. Kalaallit Nunaat ukkatarinerugaluarlugu nuannaarlunga takullugillu naapillugillu oqaloqatigerusuppakka suleqativut allamiittut, perruualaarluta takusinnaagatsigit Royal Greenlandip nioqqutissiai aallaqqaaterpiaaniit inivillugit tunisassialiarisarmatigit nunarsuarmi nuannaarutigineqarlutik mamarsaatigineqarsinnaasunngorlugit. Pingaartumik immikkut ittumik usorsimaarutigaara takusinnaagakku Royal Greenland tassaalersimasoq silarsuup ilisimaneqanngitsortaani nioqqutissiorfinnguamiit ullumikkut tassaalersimasoq nunarsuarmi immap pisuussutaanik nerisassaqartitsinermi peqataasoq pikkorissorpassuarnik sulisoqarluni tanngassimaarutigalugit suleqatitsinnik taasakkatsinnik! TSUKIJImi aalisagaarniarneq TSUKIJImi Aalisagaarniarneq (Metropolitan Central Wholesale Market Tsukiji Branch) 1935-imi pilersinneqarpoq Japanimilu aalisagaarniarfinnut tamanut pingaaruteqarluni. Aalisagaarniarfik Ginzap qanittuaniippoq (Tokyomi niuffaffiit annerpaartaat), nuna 231.000 kvadratmeterinik annertussuseqarluni. Aalisagaarniarfimmi aalisakkat 2.080 tonsit missingi ullormut tunineqartarput (Japanimiut yeniinik ullormut 1,785 millioninut). Aalisagaarniarneq tusaamasapilorujussuuvoq nunanilu allamiut takornarniarpassuisa tuniniaaffik ussagartarpaat. Ullaassakkut nal. 02 ammartarpoq nalunaaqutaq ualilernerani ataatsimut matusarluni. Ussagartut ullumikkut ikililerneqarsimapput, akitsorterussineq takornanianut ungasianiit immikkut inissaliiffigineqarsimammat. Illorsuit tuniniaaffiit pisoqalisimaqimmata Tokyomi naalakkersuisut, tuniniaavimmik piginnittut, pilersaaruteqarput niuffaffik 2012-imi Toyosup eqqanut, Tsukijimiit 2 kilometerit miss. Ungasissulimmut, nuunniarlugu. Royal Greenland Japan ukiut tamaaasa Tsukijimi niuffaffimmut (pingaartumik qaleralinnik raajanillu) Japanimiut yeniinut 150 millionit missinginut tunisaqartarpoq. Naqitaq ”Navigatio” Royal Greenland A/S-imit saqqummersinneqartarpoq • Pisartagarerusukkukku allassaatit uunga royalgreenland@royalgreenland.com Akisussaalluni aaqqissuisoq: Sofia Geisler • Aaqqissuisut: Sofia Geisler, Louise Lee Leth • Kalaallisuungortitsisoq: Karl Elias Olsen Ilusilersuisoq: Naqitat A/S, Dorte Olsen • Naqinnera: Naqitat A/S • Allamik allassimasoqanngippat allatat Sofia Geislerimit, soge@royalgreenland.com, allanneqarput Royal Greenland A/S • Postboks 1073 • 3900 Nuuk • Tel. (+299) 36 13 00 • Fax (+299) 32 33 49 • royalgreenland@royalgreenland.com •www.royalgreenland.com
Download PDF fil
Byg din egen flipbook