Royal Greenland – tunisassiorfissuaq internationaliusoq aningaasarsiutaasoq AALLAQQAASIUT Pâviâraq Heilmann, pisortaq Pahe@Royalgreenland.com Taamaattuuvugut, taamatullu pissuseqassaagut, aamma taamatut iliortarpugut. Piffissaq ilungersunartortalik atuallareerlugu, maanna iliuusissat nutaat isumaliutigilluakkallu piviusorsiorluinnartut pigaavut. Iliuusissatut taakku iliuusissat aqqaneq marlunnik immikkoortortalinnik (12 punkts plan) ilaqassaaq, taakku tunngavilissavaat Royal Greenland akiuussuseqarsinnaanerusoq. 2008/2009-p ukiuinut sanilliullugu angusat massakkut pitsaaneroriikatapput. Tuniniaanermi atukkat ajornakusoortorujussuugaluartut Royal Greenlandip tuniniaavini pigiinnarsinnaasimavai. Tassungalu unissanngilagut, suli tunisassiaativut ineriartortittuarusuppavut, tunitsivigisartakkavullu ilanngullugit, tassumalu peqataanik ingerlatsinermut aningaasartuutivut millisarniarpavut. Anguniagaavoq isertitarisartakkatta annertusarneqarnissaat Ingerlatsinermi aningaasartuutikillisaanissaq isigalugu anguniakkamut atatillugu, nuannaarutigalugu nalunaarutigisinnaavarput Nunatsinni Ilulissani rejefabrikkimi kinguppaleriffik tamakkiisumik nutartersimagatsigu. Atortut misilerarneqarnerat naammassereerpoq tunisassiornerlu nalinginnaasumik ingerlalereerpoq. Kisitsisit takutippaat tunisassiornermut atortut taarserneqarneranni angusat ilimagisamiit pitsaanerungaartut, taamaalillutalu pigilerparput nunarsuarmi raajafabrikkit pitsaanersaasa ilaat. Nutarterinerillu taamaattut ass. tassaapput suliffeqarfiutitta siunissaanik toqqammaviliisussat. Nunatsinni allami, tassa Qasigiannguani, pilerigineqarluartumik ineriigaanerusunik tunisassiornerput pilersaaruteqarfigaarput, tassalu matumani pivarput qaleralik Nunatta pissarititaa. Qasigiannguani qaleralinnut tunisassiorfik nerpinnik aamma avaleqqanik tunisassiornermik ingerlataqareerpoq. Pilersaarutit nutaat najoqqutaralugit ineriigaanerusut allat aamma tunisassiarineqalissapput. Avannaani piumaneqarluartumik qaleralimmik tunisassiorneq aningaasarsiutaasinnaavoq, taavani sumiiffimmi tassani pisaqarfiusumi pitsassuarmik ataasiaannarlugu qeritinneqarsimasumik tunisassiorsinnaagatta, taakkulu aatseriarlugit qeriteqqittakkanik tunisassianit ajunnginneroqaat mamarnerullutillu. Ilulissani raajaleriffiup nutarsarneqarnera aamma Qasigiannguani ineriigaanerusunik tunisassiuler- neq nunarsuarmut niuernermut aamma ingerlatsinermi aningaasartuutinut naleqqussagaapput, massakkullu malunniuteriikatappoq naleqqussaanerit Ilulissani aamma Qasigiannguani ingerlanneqartut, ingerlatsinermut aningaasartuutit pitsaanerulernissaannut aamma isertitsinerulernissamut, pitsaalluinnartumik kinguneqartut. Tamaangali uninngilagut! Anguniagaavoq Royal Greenland tassaassasoq ingerlatsivik aningaasarsiortoq nunarsuarmi tusaamaneqartoq, isertitaalu tassaassasut nutaaliornermut sulilu alliartornissamut atorneqartussat piginnittunut, sulisunut kiisalu inuiaqatigiinnut sulissutanut iluaqutaasussat (Takorluugaq, Anguniagaq aamma Royal Greenlandimi naleqartitat-ni allassimasut), taamaattumillu tunisassiornermi atortut/tunisassioriaatsini allanngortitsisarneq piuassaaq; piffissap kisimi takutikkumaarpaa nutaamik susoqassanersoq aamma naleqqussaanerit suut Royal Greenlandip tunisassiortuunermi siuttuunerata pigiinnarneqarnissaanik qulakkeerisussat piumaarnersut, tamannalu pissaaq aalisakkat tunngavigalugit tunisassiortuuneq kisiat isiginagu kalaallilli inuiaqatigiit tamaasa isigalugit. Eqqaamallugu, sulisut tamarmik angusaqarluarnissamut suleqataassammat. Saqqaata assitaa Julip aallaqqaataani Royal Greenlandip pisiaraa umiarsuaatileqatigiiffik „Kuunnaat ApS“ umiarsuaq pigisaa „Sermilik II“ ilanngullugu. Royal Greenlandip kilisaataata taanna kusanartoq aamma kilisalluartartuusoq Avannaani Discobugtimi raajarniartuuvoq, pisallu Nuummut tulaanneqartarput. „Sermilik II“ pisiarineqarnermi kingorna pingajussaa Nuummut tulaasseriikatappoq. Kilisaatip naalagaata (takuuk asseq qupp. 14-imiittoq, Ove Berthelsen) oqaluttuarpoq umiarsuaq taanna aalisartaleramili misilittakkamini pitsaanerpaanut ilaasoq, namminerlu 1998-imilu umiarsuarnut naalaganngorniani naammassigami allanut ilaasarsimagaluarpoq. Kilisaat qulingiluanik inuttaqarpoq (9), aalisartut arfinillit aqumiullu pingasut, aalisarnermilu kingullermi 143 tonsinik tulaassisimapput, tamannalu naammagisimaarnartorujussuuvoq, taamatut oqaluttuarpoq umiarsuup naalagaa. Navigatio Royal Greenland A/S-imit saqqummersinneqartarpoq. Pisartagaqarneq akeqanngilaq uunga noqqaassutigineqarsinnaalluni royalgreenland@royalgreenland.com. Akisussaalluni aaqqissuisoq: Siverth Amondsen • Ilusilersuisoq: Naqitat A/S, Tupaarnaq Jupin Haase • Naqinneqarpoq: Naqitat A/S. Allamik allasserinnittoqanngippat allattuuvoq Siverth Amondsen, siam@royalgreenland.com. Royal Greenland A/S • Postboks 1073 • 3900 Nuuk • Tel. (+299) 36 13 00 • Fax (+299) 32 33 49 • royalgreenland@royalgreenland.com • www.royalgreenland.com
Download PDF file
Build your own flipbook