Nunatsinnut tunisassiat – angusaqarfiulluartoq Assimi takuneqarsinnaavoq Tuniniaasartoq Ingo Hansen oqaluttuartoq Nunatsinniit pisiumasut qanoq amerlasartigisarnerannik aamma „pigisavut piumaannavikkaat“. Assimilu takuneqarsinnaapput tunisassiat piumaneqarnerpaat, kiisalu saarullimmit panertut – tunisaalluartoq. Pâviâraq Heilmann, pisortaq Pahe@Royalgreenland.com Royal Greenland aqqutigalugu Nunarput tusaamaneqalerpoq, Royal Greenlandillu ukiuni kingullerni danskit pisisartuisa tungaanuut kiisalu nunarsuarmioqatigiinnut allanut ineriartornera aamma alliartornera pitillugu, Kalaallit nunaannut ilisimaarinninneq kiisalu tunisassiaatitta tusaamaneqarnerat, allaniillu tunisassiassanik pisisarnivut eqqarsaatigalugit, tusaamaneqarneq ukiut qulilluunniit matuma siornagut ilimagisamiit anneroqaaq. Taamatut ineriartornerup Nunatsinniinnaq tunisassiaativut aamma sunnersimavai: Nunatsinniinnaq tunineqarsinnaasut tunisassiaativut pisiniarfiit nillataartitsiviiniittut/ qerititsiviiniittut nioqqutiinnavippaat, aamma Royal Greenlandip Nunatsinnuinnaq tuniniartagaanik piumasut siarngutiinnavipput. Tunisassiaativut pitsassuit amerlangaarmata inuit isumaqartarput suna tamaat sapinngikkipput – ilumoorpormi! Royal Greenlandimi soorunami tunisassiaativut nuannaarutigeqaavut; tunisassiat avannaarsuata imartaaneersut immikkorluinnaq ittut, tuniniaariaaserpullu ukiuni kingullerni amerlasuuni piviusunngortissinnaasarput – Avannaarsuani tunisassiorsinnaanermi atukkat ajornaruttortut tunisassiorneq sanarfisimasarput, kalaallit pitsinnik aamma nunani allani tunisassiassatsinnik pi- siarisartakkatsinni, imaanit pisunit tunisassiortutut, isigineqaammik pitsaasumik aamma Nunani avannarlerni Nunarsuatsinniillu ataqqineqarnermik pigisaqalersimavugut. Allat uatsitoqqissaaq angusaqanngillat, taannalu killiffik angusimasarput, ulluinnarni aqutsisut sulisullu Royal Greenland sinnerlugu ajugaasimaarutigaarput. Sulialli maanga uninngillat, suliassaqaqaavullu; Nunarsuaq unigani ingerlavoq pisisartullu piseriaasiat ullormiit ullormut nikerartuuvoq. Tunisassiornerpullu pitsanngorsartuarumallugu siumut ineriartortuarluta ingerlajuarpugut, siunertarlu imatut oqaasertaqarpoq ´Royal Greenland Nunarsuarmi tusaamaneqartuulluni ingerlassaaq, nutaaliortuartoq aamma imaani pisunit pisiffigiumaneqarnerpaaq´ tassanilu oqaatigineqarpoq suliffeqarfipput suli alliartussasoq – avammummi tunisartakkavut pissutigalugit, kisianni aamma Nunatsinni nunatsinnut tunisassiornerput puigornagu. Tunisassiat pitsassuit amerlasuut pigigatsigit isumaqartoqartarpoq sunaluunniit tunisassiarisinnaagipput – ilumoorpormi! Inuppassuit nunatsinni isumaqarunarput sunaluunniit neqeroorutigisinnaagipput – tunisassiat pitsaanerpaat pisisartunut muteerniusunut tulluarsakkat – aamma tamanna eqqorpoq! Sunaana pissutaalluni nunatta iluanut tunisassiat taama iluatsitsigisut? Nunatta iluinnaani tunisassiassanik tunisassiorneq tassaavoq imaanit pisunik tunisassiornerit ajornakusoornersaat, taamaattuarsimavoq sulilu taamaappoq. Ukiorpassuit ingerlaneranni namminersortut aamma taamaattunik tunisassiornermik misileereerput, ataasiakkaannguit qaleralinnik qullukkiornermik iluatsitaqarput, Royal Greenlandilli Nunap iluanut tunisassanik tunisassiorfiata tunisassianik assigiinngtsunik 41-nik massakkut tunisassiaqarpoq, taakku tamarmik nunatsinnut tamarmut tunisaapput, kiisalu Danmarkimi pisisartutsinnut takuuk karsi takutitassiaq tunnisassiaatitta ilaanik takussutissiisoq. Taamatut angusaqarnermut aqqut takisimavoq. Ukiorpassuarni sulinikkut Royal Greenland aatsaat maanga killissimavoq; sulisut sulilluartut, immikkoortortani pilersaarusiortut kiisalu ulluinnarni aqutsisut qulliit suleqatigiilluarlutik, kiisalu pilersaarusiorneq aaqqissuussaalluakkap angusat makku pilersippai. Royal Greenlandimi ilisimasavut piginnaanerpullu tunisassianik ineriartortitsinitsinni atorluarsimaqaarput, iluatsinnerli tunisassiaannarnit pinngilaq, pissutaasorpiaq sulisut pikkorinneranneerpoq aqutsilluarnermeerlunilu. Maannakkullu periaasissat aqqaneq marluk „12 punkt plan“-imik taasarput atorlugu Nunatsinni nunatta iluani tunisassiornerput tunisassiaativullu nukittorsarneqassaaq. Tunisaanerpaanut ilaavoq saarullik panertoq, kisianni aamma SUSHI-liat, kapisillit kotelettiliaralugit, eqaluk kotelettiliaralugu, qeeqqat aggukkat, qeeqqat uulliat, suluppaakkat nerpii amiikkat, qalerallit ilivitsut, qalerallit amiikkat, uiluiit suattalerlugit, tunisassiat taakku tunisaalluartorujussuupput – assimi takuneqarsinnaapput tunisaalluartut ilaannaat. Asseq quppernermi qullermiittoq: Nuummi Nunatta iluani tunisassanik tunisassiorfimmi sulisut. Assimiipput Nuummi Royal Greenlandip fabrikkianeersuupput, taakku assimiittut nunatta iluani tunisassiassanik sulersuataaleruttortut – tuniniaasartoq Ingo Hansen, lagermand Ove Lyberth kiisalu suleqataat. NAVIGATIO NR. 29 2010 3
Download PDF file
Build your own flipbook