Qarasaq assaallu atorlugit sulineq Malik Skiftep Svendborg International Maritime Academymi (SIMAC) mistalitut ilinniarnini 2010-mi naammassivaa. Royal Greenlandimi atorfineqqaarami mistalit pingajuattut sulilerpoq, kingorna mistaliunertut kilisaammi Qaqqatsiami atorfeqalerpoq. 2014-imi kilisaammi atorfeqarunnaarluni Royal Greenlandip Nuummi Qullersaqarfiani kilisaatileriffimmi maskininspektøritut atorfinippoq. - Mistalitut sulineq unammillernartunik pissanganartunillu misigisassaqarfiuvoq. Suliassat allanngorartuummata saniatigullu suliassat nakkutigisassaammata mistalitut sulinermi qarasaq assaallu atorluarsinnaasariaqarput. Mistalitut suleqatiginikuusakka qujanartumik pikkorissorsuusarmata misilittagaqarluartuullutillu nalornisoornermi saaffigineqartuaannarsinnaasarput, Malik Skifte oqarpoq. Malik oqaluttuarpoq mistalitut sulinermi nakkutigisassat eqqumaffissassallu amerlammata misilittagaqaleriartorneq ilutigalugu maluginiutit atorluarnissaat ilikkarneqartartoq. - Kilisaat tunisassiorfiatalu ajoquteqanngitsumik isumannaatsumillu ingerlasinnaanissaat sulissutigisarparput, pingaarnerpaajuvormi isumannaatsumik sulisinnaanissaq. Malik Skifte maanna Royal Greenlandip Nuummi Qullersaqarfiani kilisaatileriffiani maskininspektøritut atorfeqarpoq. Suliffeqarfiup angallatit akunnattumik angissusillit pigisai teknikkikkut nakkutigisarai, saniatigullu aamma Imarsiornermik Qullersaqarfiup malittarisassat maleruaqqusai Royal Greenlandip kilisaataataani malinneqarnersut nakkutigisaralugu. Inuusuttunut mistalitut ilinniagaqalerusuttunut ima kaammattuuteqarusuppoq: - Qarasaq assaallu atorlugit sulerusukkaanni mistalitut ilinniarneq pilerinarluinnartuuvoq periarfissaqarnarlunilu. 2
Download PDF file
Build your own flipbook