Asasara suleqat Morten Sander, Suliffeqarfissuup tuniniaanermi pisortaa / Vice Direktør Jesper Frank Nunarsuarmi aningaasarliorneq Navigatiop siuliini pingaarnerutitami qitiutinneqartarput – tamannalumi tuniniaanitsinni suliffeqarfitsinnilu suli sunnerneqaatigivarput. Piffissaq imaannaanngitsorujussuaq maanna aqqusaarparput, taamaammallu pisisartutsinnut attaveqarnerput naapitsinerpullu aalajangiisuusorujussuulluni. Naapinnissaannullu periarfissaqarsimavugut tassa 26.-28. april Bruxellesimi European Seafood Expositionimi tamanna pisinnaasimalluni. ESE nunanit 150-t sinnilinnit aggersunit orninneqartarpoq, takkuttullu tassaasarput pisisartut tuniniaavigisartakkatsinnilu aalajangiisartut. Taamaattumik saqqummersitsinermut peqataaneq pisisartut amerlasuut sumiiffimmi ataatsimi naapissinnaanerat eqqarsaatigalugu aningaat amerlasoorsuunngitsut atorlugit pisinnaavoq. Najuunnerput aqqutigalugu nioqqutissiat nutaat nittarsaassinnaavagut, pisisartut nutaat naapissinnaavagut, unammillertigut qanoq iliornersut takusinnaallugu allannguutillu suunerat maluginiarsinnaallugu. Ulluni ulapaarfiusuni pisisartutta pisiffigisartakkatik qanimut naapissallugit piffissaqarfigineq ajorpaat. Taamaattumik ESE-mi najuuttarnerput periarfissatsialaavoq pisiniarfis- suarni, neriniartarfinni allanilu nerisassiorfiusuni pisisartut qaaqqullugit oqaloqatiginissaannut. Tamannalu pisinnaasimavoq saqqumersitsivitsinni 152 m2-terisut angitigisumi. Saqqummersitsivitsitta neriniartarfiani periarfissagissaarpugut akornusersorneqarata pisisartut pisiffigisartakkagullu ataatsimeeqatigisinnaallugit, oqaloqatigiissutigalutigit akit, nioqqutissiat nutaat assigisaallu. Tunisinissamik pisinissamilluunniit isumaqatigiissuteqarneq tamatigut ESE-mi pineq ajorpoq, maanili anguneqartarpoq attaveqaqatigiilerneq. ESE-p kingorna attaveqaqatigiilernerit tigussaasumik malitseqarsinnaanersut tuniniaasutsinnit misissorneqartarpoq. Tassalu pisisartutsinnut qanimut attaveqarneq anguneqartarpoq taakkununngalu takutittarparput suliffeqarfipput suunersoq qanorlu siunertaqarnersoq. Saqqummersitsivipput ukiormanna nutaanngortinneqarpoq, ilisarnaatip isikkuatalu nutarneeqarnerata malitsigisaanik. Saqqummersitsivik pitsaassutsimik, imaaneersunik nioqqutissianut, nutarterinermut, Kalaallit Nunaannut suliamillu aallussilluarnermik tunngatitamik ilisarnaasersugaavoq. Nutarterinermut pisisartunit iluarisimaarneqarpoq malitsigisaanillu ornigarneqarluarluni. Nittartagaq pisisartunut sammitinneqarnerusoq atoqqaartipparput, nittartakkamilu paasissutissat pisisartut sulisullu sivisuumik noqqaassutigisimasaat nassaarineqarsinnaalerput. Neriuppunga ulluinnarni sulinissinni atorluarumaarissi. Annertuumik nersualaagassaavoq Jan Soinjoki nioqqutissianillu ineriartortitsinermi immikkoortortami suleqatai. Nioqqutissiassatut ineriartortitat tallimat nersornaasigassanut ilaatippaat. Sassaalliutigeriaannatut ineriartortitami Fish ´n´ Rösti ajugaavoq, taannalu aqqutigalugu Royal Greenland suliffeqarfittut ineriartortitsisutut eqqartorneqangaatsiarpoq. Saqqummersitsinermut upernaarmanna takkuttut siornamut sanilliullugu 25 procentimik ikinnerugalartut saqqummersitsivipput ornigarluarneqaqaaq. Piffissami matumani aningaasatigut ajornartorsiorfiusumi ornigarluarneqarnerput angusaavoq pitsaasoq – suliassarlu tullinnguuttoq tassaavoq saqqummersitsinerup nalaani pisinissamut soqutiginnillutik saqqummersut niueqatiginissaannut tuniniaasutta sulinerat. Navigatiomi uani atuarsinnaasavit ilagaat nittarsaassisartut Corporate Marketingip saqqummersitsinermi ineriartortitsineranut tunngasoq aammalu nioqqutissiassanik ineriartortitsisartut Seafood Prix d’Elite pissarsisitsisut sulinerat. Atuarluarina! RG Sisimiut (Naqitap saqqaa) Ukiut 45-t matuma siorna, majip ulluisa aappaanni 1945, aalisartorsuup Elias Kleistip Sisimiuni fabrikkip illuataata nutaap maskiinai ikippai, piffiillu nutaat atuutilerput. Fabrikkimi maanna nioqqutissiarineqarput rejet saattussallu. Taakku tamarmik nioqqutissiaritillugit sulisut inuit 150-t missaanniittarput, rejelerinerli kisiat ingerlatillugu 120-t missaanniittarlutik. Sisimiut 1756-mi tunngavilerneqarpoq, qallunaatut taaguutaanut atsiunneqarluni Greve Johan Ludvig Holstein. Sisimiuni illoqarfitoqqamiittut illutoqqat nunasiaateqarnerup ukiuini siullerni sanaajupput, nutaannginnersaat 1756-mi sanaajulluni. Oqaluffitoqaq 1775-mi atulerpoq. Aalisakkerivik siulleq, aamma nunatsinni siulliusoq, 1924-meersuuvoq. 1931-mi sananeqarpoq nunatsinni amutsiviit siullersaat aalisakkerivimmut ungasinngitsumiittoq. Ullumi inuit 6.000-t sinneqartut Sisimiuni innuttaapput. Navigatio Royal Greenland A/S-imit saqqummersinneqartarpoq Pisartagaqarneq akeqanngilaq uunga noqqaassutigineqarsinnaalluni royalgreenland@royalgreenland.com Akisussaalluni aaqqissuisoq: Sofia Geisler • Ilusilersuisoq: Naqitat A/S, Malene Kuitse Andersen • Naqinneqarpoq: Naqitat A/S Allamik allassimasoqanngippat allattuuvoq Sofia Geislerimit, soge@royalgreenland.com Royal Greenland A/S • Postboks 1073 • 3900 Nuuk • Tel. (+299) 36 13 00 • Fax (+299) 32 33 49 • royalgreenland@royalgreenland.com • www.royalgreenland.com
Download PDF fil
Byg din egen flipbook